Гlелмудал керенги ракьалда букъун, Кьижун нуж кин ругел тlулалъул вацал? Диналъул хlубиги гьанже беканин, Бегьилищ рукlине сихl къотlун яцал? Васал гlемер руго дир имгlаласул, Кирдай нуж рукlарал кьалда вацги тун? Гlагарлъи кlудияв Муртазагlали, Гlайиб букlана мун эдин хвезе. Эменги вугоха анив чlеларин, Чlор меседил индал гьоркьоса бахъун. Вацалги руго дур гlодоре къулун, Къолден тlад щулияб ретlине ккелин. Дур эбеалдехун хабар бицине, Эхеде, росулъе, щу дай ахlилев? Ахlараб рагlизе, гlумро гьабизе, Гьанта гlолеб гьечlо эй гъарималъул. Гlадамазул рокъой цохlо къоролай, Кlиго тана дуца, ракl унтиялъе. Цогидазул лъимал цо рокъор руго, Рукъ кlиго биххана дир вацгlаласул. Къураналде гуреб бер балагьичlев, Берал кин къанщарал, Муртазагlали? Диналъул гурони хабар бицинчlев, Хабар щай къотlараб, Муртазагlали? Дур кодоб хlаллъараб Къураналда тlад, Хlур бетун хутlилин, хlинкъун руго ниж. Дуца рухl бичарал динул ахlкамал, Лъица гьанже вацгlал тlуразарилел? Мун жанив сверарал гlатlидал къватlал, Къваридго рихьулел руго нижеда. Къваригlелалъ арав, рокъове щвечlев, Щвайги дуй кlудияб бичасул Алжан. Дур би годоб тlураб гlурдаллъиялда, Гlун рачlун рихьула алжанул гъутlби. Дур берал сун арал санул рагlалда, Сси бугел хlанчlаца бачуна зикру... З.П.Р.