(Баракат гьарзаяб Бакълъухъа МухIамад ХIамзаевасе)
Херлъана, халлъана саназул зулму,
ЗахIматго рорхуна гьанже эхеде,
Ххулула беразда бухIараб магIу,
МагIнагун анадай гьаб гIумруйилан.
ГIодиги, релъиги, рокьиги, ццинги,
ЦIцIоб гIатIидас нилъей кьуна бащадго,
Кьижараб лъимадул бадие къулун,
Бакъанимех щванин къварилъула мун
Малъкъосараб гIасру, гIассилъараб халкъ-
Нилъги гьезда гьоркьор, бокьичIониги,
Ислам бикь-бикьараб рокьукъаб заман-
Нилъги гьелъул тIанчIи, тIатинчIониги
РикIкIаде роржуна хиялазулъ нилъ-
Хвараб, араб, чIвараб чIалгIаде заман,
Зам-зам гьекъечIого, зулму- хIалалда,
ХIабургъараб лъеда чIварабщинаб кIал
ТIарикъат, шаригIат, гIибадат, тавбу-
ГIумру цIакъ бокьиялъ, гьоркьоб хутIана,
Ралел каказулъги, сахI-кIалалъулъги
КIарчанлъи нилъерги букIараб гIемер
Исламалда инчIел таманал сонал,
Сундалъун рецIилел ахираталда?
Диналда хурхинчIел саяхъал къоял,
Метерисеб къоялъ къаладай щокърор?
Къудратасда цере кин рахъун чIелел-
Гьаб жахIдагун,ццингун, гьаб жагьиллъигун,
Жундузда рекъараб мекъаб хьвадигун,
Хьолбохъ иман гьечIеб гьаб къапилагун?
Къвалакь кквечIеб Къуръан, сверичIел чIумал,
ЧIинхаца чIвалезулъ рукIинадай нилъ,
РекIехъе лъалареб цониги ссура,
Сурав босулелъул сунда мугъ чIвалеб?
Гъибат-бугьтаналъе даим рагьараб,
КIал-мацI букъиладай щулиял квараз,
Щвараб кеп босарал бахьинал лугбал,
Борхьаз кваналадай, рахIму гьечIого?
ГIарас майданалда эхетун чIедал,
Нилъер Жаннаталде божи бугодай,
ГIибадат кIочарал кIарчанал ракIал,
ЖужахIалъул бакьулъ, огь, роркьиладай?
Амма херлъанагIан, хвел бичIчIанагIан,
Халикъасе хIелун, чIвала накаби:
ЧIалгIанин гьаб гIумру-чIобогояб жо,
ЧIурканаб ахират гIагар гьабейин.
ГIазизго ритIула зодихъе кверал,
Нижер болжалалда тIад хIучч цIайилан,
ЦIияб къо рещтIингун щурула кIутIбуз,
Шагьадатги битIун, тIоритIейилан.
ТIагIам гьечIеб дунял, гьанибго толеб,
ХIетIе таричIого тIамизе кIвечIеб-
КIудал мунагьазул гьир бакIлъилелде,
Гьарула, БетIергьан, тIаса росе ниж.
Автор: Умахан Андийский |
